2013年~大家最緊要健康!!!!!!!

首圖 : 年初一(0:00am), 超有霸氣的Yin B~

新一年, 最緊要祝大家身體健康!

唔好睇Yin B呢張相咁有氣勢,

一日後, 佢就慘到無朋友 ><''''


大年初一晚, 去完太嫲家拜年番到屋企,

Yin B 就發燒出疹了....鳴鳴.

今次係患左"手足口"病.

對於平時超為食的Yin B,

呢個病真係一大折磨.

足足2日佢完全食唔到野, 一日3餐淨係靠食雪糕頂肚.

你無聽錯, 係食雪糕!!!

因為醫生話, 手足口最辛苦就係食唔到野,

只要BB食到咩就俾咩佢食,

有無營養已經唔係首要條件啦, 最緊要佢食到.

食物一定要夠凍,

當然我地都有嘗試俾其他凍野佢食,

eg: 冰凍奶, 凍椰皇, 乳酪, 凍粥水, 海棉cake...

不過只有食雪糕, Yin B先會唔會大喊仲會食到好開心.

其他的一律見到都喊到收唔到聲

果2日, Yin B都係餓住訓, 試過3:00am餓醒左,

我同奶奶諗住喂佢食粥水, 佢見到吞口水就喊晒口...

最後我地只好一邊喂佢食雪糕, 一邊喂佢食海棉cake (起碼飽肚d)

之後食到痛又喊, 喊攰左又訓...


拍攝日期 : 14/2/2013


13/2 晚, Yin B仲留院觀察左一晚,

無再發燒, 14/2早上開始飲到奶啦~

當日3:00pm就出得院番屋企.

算係我同Yin Ba今年情人節最好的禮物!!!!

**佢個面珠dum都當堂細左一個碼***


拍攝日期 : 16/2/2013

Yin B 可以食番野後, 

除左手腳的紅疹/ 水泡未退晒之外,

同平時已無咩分別...不過感覺佢比之前更好動, 更無時停..

但作為媽媽的心態, 

寧願見佢做番一隻無時停的小魔怪, 都唔不願見到佢喊晒口的陰公豬.



事情告一段落?

本黎就係既...

點知Yin B 出院當日,

Yin Ba就發燒了, 燒左兩日,

最後, 佢都中招啦 -- 又係"手足口".

唔好以為大人""手足口"會好過小朋友,

實情係仲嚴重仲康復得慢><"'''

Yin Ba 手腳出紅疹, 又痕又大粒...

之後頭皮都出埋..

醫生寫左紙要佢放多一個星期假,

如果仲未好清, 仲要寫紙俾佢放假係屋企隔離. ><""



經歷左一個咁樣的新年,

依家對我黎講, 

新年利是多少唔重要,

節目好唔好玩唔重要,

最緊要係一家人健健康康!!!!

希望各位BB同媽咪, 仲有你地的家人新一年都要健健康康!!!!