成長~出街食飯

終於黎到2013年的最後一個月啦~

我都荒廢左個Blog成個月有多...

依家係時候剪吓雜草啦XDDD


12/12/2013

琴日老爺放假,同奶奶湊左Yin B出去探太嫲.

夜晚就黎左灣仔(我公司附近)的榮興小廚食晚飯.

Yin Ba公司係金鐘收工過黎都好方便.

♫ Happy 17,18, 19 Month ♪

呢個標題自己睇到都眼突...

我竟然要Backdate番咁多野 = ="

不過唔寫又好似差咁d,

始終Yin B每日都有唔同,

更何況係每個月呢?!

多少與否,記得幾多就幾多啦~

慶生~我又大一歲啦!!!

Yin Ma我又大一歲啦!!!

正確黎講係又"老"一歲先岩 = ="


上星期五係我正日生日,

自從生左Yin B後,

今年係我第二年工作中渡過囉~呵呵

可能人大左又生埋B,

無左細個時生日一定要大肆慶祝的心態!

講就咁講,但生日飯&生日禮物點都唔少得既~嘻嘻


24/10/2013

生日前一晚先黎張溫馨滿瀉>>我同Yin B的birthday kiss合照~

驟眼睇好似我錫Yin B咁~

其實呢個人仔依家好識野,超保護佢的初吻咖XDDD

平時我地叫佢錫錫,

佢都係用個額頭撞埋黎就算啦~

就算我呢個做阿媽都唔例外呀T.T(真陰公囉~)

成長~小蜜蜂vs大黃蜂

琴晚Yin B著番婆婆係佢6個月時送的蜜蜂衫,

估唔到一年後竟然仲岩著.

睇番相, 果時的小蜜蜂依家已經變成一個大黃蜂囉~

又曳又惡死 ><"

不過開心時個樣都仲係幾可愛既~

仲有兩日Yin Ma我就要飛飛啦~

你呢個大黃蜂要乖d啦~

媽媽番黎鍚晒你~^33^

成長~歲半針@健康院 (全文字)

係時候update番Yin B的成長進步了...

我都知呢排懶左好多...

事關我仲忙緊旅行d野><"

Yin Ba仲話明明係去散心玩下, 

我就成個緊張大師咁...

佢梗係講得輕鬆啦, 因為佢完全無plan過任何野, 

到出發果日佢就係準備人一個就算...

算了...男人唔需要同佢解釋太多!

28/09/2013

同上次(一歲)一樣, 我地都係book左星期六的早上番健康院.

好在係唔使請假, 唔好就係人超多(因為下午休息),感覺姑娘做野無咁細心.

去到等左15mins,Yin B就去磅重.

12kg,仲算係大隻仔一個.

成長~發睥四@開門篇

上星期足左一歲半的Yin B,

最近講野都仲係唔多,

教佢既野聽唔埋3句就走人...><"

一日到黑淨係識入廚房拎d砂煲罌罉黎玩,

d杯杯碟碟俾佢玩到亂晒位置....

聽日就番健康院啦, 真唔敢想像見姑娘時會點...= ="


學野無咩點進展, 但d脾氣就勁囉!!!!!

琴晚湊佢上房瞓, 佢又第一時間係度玩門.

我激鬼氣就關埋門唔俾佢玩,

點知佢竟然"窮兇極惡"咁既樣,

我同Yin Ba都 O晒嘴~

錫到佢燶的爺爺仲第一時間話我地仲咩搞忟佢個孫...= =''''

心情~退一步係.......

好耐無寫文啦~

最近忙住Plan行程, 我冷落左呢個新Blog..

但我都有留意住各位Blog友的動向咖~

雖然唔少媽媽Blog友都感覺呢度比之前冷清..

但只要有心..我相信好快大家都會活躍番既..

俾d時間啦~總之唔好放棄呀~你地係我寫Blog的精神支柱呀!!!


本黎應該同大家分享下Yin B的成長..(好似有一個月無佢既post啦><")

不過我近曰的心情真係好煩,

依家仲未完全調節好..所以容許我係呢度同大家呻下吧~


我自問EQ唔算係低的人,但最近忍到好似有d爆煲的情況.

琴日同另一伴呻時,

換黎就係黑面&"你諗多左啦"

佢地,永遠都唔明白女人同女人之間的想法.

慶祝~8週年紀念

我同Yin Ba的8週年紀念日,

本黎都唔打算特別慶祝既~

事關呢排我忙到痴膠花,

先係上月底Y-Blog宣佈折埋, 

搬Blog執相都搞到我死死吓,雖然我出品唔多,不過都搬到嘔心瀝血

好在依家事情明朗左好多,

唔少媽媽Blog友圖文並茂教學(特別嗚謝肚B媽,小檬媽,大爺媽...)

仲有要忙就係下個的韓國自由行,

依家Plan行程真係苦過弟弟呀....(我一見到XO文字就頭都大晒!!!)

辛苦還辛苦,

8週年,點都要簡單食餐飯慶祝既~XD

星期六我地就去左呢間朋友仔介紹的西餐廳食Lunch~

今日~我們八週年啦♥

今日,是我和你攜手共渡的第八個年頭~

八年, 時間不算短,也不算很長 (至少我們的人生還有漫漫長路)

我們彼此由相識, 相愛, 相知, 到相信,

當中有樂, 亦有悲.

但我仍感謝上天讓我們在茫茫人海相遇 (緣份真的得來不易),

你令我的人生增添了無限色彩.

但願往後的日子裡, 我們能夠繼續亙相包容同忍耐,

一家三口幸福下去!

重要公告：Yahoo! Blog將於2013年12月26日起關閉服務

今早先睇到呢個通知!!!

岩岩算係同咁多Blog友熟絡左,

依家咁快就話要分離 

之後仲有無咩平台可以再同大家contact 落去呀?

~好灰~

原文網址 :

http://blog.yahoo.com/yblog_hk/articles/135086

淘寶~嬰兒安全用品

Yin B 識行就快大半年, 

佢係屋企跌倒撞損的次數就多到呢.....

呢2個月算係跌得最多同最甘既..

坦白講, 佢整親邊度我都會心痛, 但有時都要睇開一點,

畢竟呢d係佢地必經階段 (我地細個有邊個未跌過呀), 

即使有時自己睇到實一實, 都會有出錯的時候. 

所以屋企人睇住Yin B 都出事時, 我都係心裡嬲幾下, 然後就走去拎藥油算~

~門欄~ (連結按此)

起初我幾驚size唔岩, 因為自己大意度錯左寬度~

好在最後都good fit~

出入都好方便, 連62都大讚~

裝左佢後, 就可以由Yin B係度行黎行去都無咁驚驚 (有次我見Yin B企係樓梯邊度向下望..嚇C我呀)

成長~一齊來跳鄭多燕≧∇≦

最近好忙好忙好忙好忙好忙....

上星期同事出Trip一星期, 我就一個人幫手處理佢平日負責的公事...

加上呢排我忙於做"美味人妻"...lunch time係咁喪刨食譜....

積積埋埋一大堆Blog 文....

所以依家都係清理的時候嚕~


<鄭多燕>相信唔使我多講, 

好多mama都知佢係邊位啦~

自從生完Yin B至今, 我的體重都仲未回復懷孕前...

雖然整體上同之前分別不大, 不過瘦多一點, 著衫就多一點本錢..(唔使咁多限制)

減肥真係我的終身事業

最勤力時, 我真係一星期3次跑步1個鐘...依家叫我跑15mins都難...(難的係無時間呀)

所以有時會係dinner過後跳下<鄭多燕>~

我跳的只係15mins精華版, 其他的仲未上手....

重點黎啦~~~~~~~~~~~~~

每次我跳鄭多燕時, Yin B呢隻豬仔總係有意無意行黎行去, 唔係就喪搞我張瑜珈墊 = ='' 

明明每次15mins的健身操, 俾佢咁搞一搞就變左30mins...(但消耗的卡路里無多過囉~)

今次最搞笑, 係佢竟然同我跳埋一份....

有時真係俾呢個人仔笑死

P.S. 今次我出賣左自己的甲組腳, 瘋婆素顏, 你地點都要支持下呀~

成長~開心泡泡浴

Yin B 最近好扭計呀, 

好多時都唔知佢喊咩野..心情飄忽到呢~完全唔知佢想點.

今早起身開奶俾佢, 99諗住湊佢去左尿尿先,

點知佢就喊晒口咁 (平時都唔會既),

之後99諗住去廁所, 我睇住佢飲奶.

99一轉身咋, 佢就喊到拆天咁, 我呢個阿媽點tum都無用

Yin Ba仲以為我搞喊佢 = =''

最後要99番黎抱住佢飲奶先無事.....

唔通便秘真係咁影響心情?!!! 


話說呢一晚我同 Yin Ba 如常湊佢去洗白白,

又係唔知佢仲咩事, 一入到廁所就係咁喊.

就連平時最鐘意玩既的櫃門都tum佢唔掂 (好媽媽千祈唔好學我咁tum小朋友呀..我係逼於無奈先咁做咖 &gt;&lt;") 

最後醒起之前買落的吹泡泡, 拿拿林拎出黎玩~

好在得左, 成功收聲

你睇下Yin B 見到泡泡的開心樣, 完全想像唔到佢前一秒大喊十既樣係幾咁"恐怖"

被泡泡包圍既幸福樣

捉泡泡 ^^ 

雙眼發光~

最後連沖涼都唔放過, 繼續玩~

送多張浴(肉)照相俾大家~ 祝各位 BB 每晚都有個 Happy Bath Time!

成長~大便出血 (純文字)

之前Yin B 間中都有大便出血的問題,

正確應該係poo poo時, 大便偏硬&粗身呵損左肛門,

所以同佢抹pat pat就會有少少血跡.


當時情況未算好嚴重,

99同圍村的C9講起, 個個都第一時間話Yin B 飲得水少.

飲水呢樣野, 我地成家人自問真係做得好足,

基本上大家輪住黎喂佢飲, 有時我提下Yin Ba, Yin Ba提下62, 如此類推...

Yin B 大大下都習慣左, 開始無細個時咁抗拒飲水, 再加上依家天氣熱, 飲水量仲多左咖.

雖然係咁, 我地都有再加把勁喂Yin B飲多d水, 

希望改善情況.


直至上月底 (26/7/2013), 

情況不但無好轉, 仲嚴重左 &gt;&lt;"

最後係兩日後晚(28/7/2013)去港安醫院求診.

而醫生的結論 : 呢個係" 慣性便秘" 問題, 開左藥水同藥膏, 

之後飲食要"更加"多菜少肉, 戎食麵包, 蛋糕, 就算要食都只可以要食麥包,

仲有加紅米黎煮飯 / 粥 (增加纖維), 奶粉要再開稀d~


因為夜診(時間趕)再加上醫生話問題唔大, 

當其時我無刻意問醫生點解要戎食麵包, 蛋糕.

最後上網做左唔少資料搜尋, 終於知道問題係邊~


首先了解"便秘"的定義, 好多家長 (包括我)一直都以為便秘即係無大便.

如果BB幾日都無得去就係便秘.

但其實BB幾日先去一次便便 / 大便唔暢順 / 大便中有粒粒 / 大便顏色較深或呈綠色/ 大便好臭或有酸味，

呢d全部都唔算係便秘, 只要最終排出的大便係軟身, 都算係正常.

真正的便秘係排出的大便硬身&粗, 排出時好用力, 嚴重的會導致肛裂出血 ( Yin B 中晒呢幾點)

如果平時進食過多高鐵質, 高蛋白質食物 (如動物肝臟及紅肉/雞蛋/蛋糕/麵包), 較少高纖維的食物, 就會易造成便秘.


回顧番之前Yin B 的飲食習慣, 其實係存在唔少問題 :

- 平時飯仔/ 粥仔肉類較多, 同蔬菜比例係 1: 1, 正常應該係 1:3, (最近我先發現62煲粥俾Yin B 係豬肉&魚肉打孖黎 ) 

- 食得多高蛋白質食物 (雞蛋/蛋糕/麵包), 平時62習慣收工都買麵包/卷蛋送奶茶做tea, Yin B 又好鐘意食麵包/蛋糕,

  自不然就會lur食, 佢最勁果次係食左一件半卷蛋....&gt;&lt;"

-仲有當BB越大時, 奶量會受到厭奶的影響而降低, 此時佢地飲用的奶粉配方含蛋白質會較多, 以彌補因奶量下降

 而減少蛋白質吸收的不足. 但如果BB的奶量唔錯 (以Yin B 依家仲係3餐奶, 佢的奶量算係唔錯啦), 而我地同時又

 再喂食高蛋白質食物(如上), 就會造成BB吸收過多蛋白質而便秘.


知道問題係邊度, 依家我地都大大改善左Yin B 的飲食, 

上星期四(1/8/2013) 都見到d成效, 無出到血, 便便好軟身.

不過星期六又見番紅, 幸好便便仲係軟身,

但99就認為係藥水的成效居多, 怕之後唔食藥水情況未必會改善 (搞到我都有d擔心)

星期日 (4/8/2013) 覆診, 同醫生講左仲有出血的問題, 

佢聽完就用手指插入去Yin B 肛門做左個簡單檢查,

話係肛門裡面損左的地方仲需時埋口, 所以先仲有出血問題.

仲有就係原來之前醫生開的藥膏, 藥劑師講錯左擦抹方法 (係要唧係肛門裡面, 唔係擦出面),

所以Yin B 的肛門先仲未埋口...聽完我同Yin Ba都有燥燥地...(因為拎藥當日, Yin Ba有再三問個藥劑師擦出面定裡面咖)

不過知道左就算, 依家最緊要係睇埋呢個星期大便情況,

希望下次覆診時咩事都無啦~


最後送上簡單的預防BB便秘的方法 (如果大家有更好的意見, 記得話我知呀, 感激萬分) :

1, 多進食高纖維的食物 :  蔬菜 / 瓜果(菜) - 菠菜/蕃薯

2, 每日進食2份生果 (eg : 午/晚餐後) - 香蕉, 梨,

3, 多飲水,確保充足水份

4, 減少補充過多高鐵質, 高蛋白質食物 (如動物肝臟及紅肉/雞蛋/蛋糕/麵包)

5, 可加入紅米(營養&纖維高)煲粥/ 煮飯

6, 養成良好的排便習慣-可在早餐或晚餐後讓BB坐盆或排便椅，並注意擺好正確的姿勢，養成良好的排便習慣

7, 家長應盡量以鼓勵及獎賞方法教導, 不應強迫或威嚇他們"坐至屙到為止",否則BB可能因生怕而感到厭倦，造成慣性便秘 

心情~黑色星期

今個星期我真係過得好辛苦呀~ 唔係! 應該係用"嘔心" 黎形容


28/7/2013 (Sun)

呢排Yin B 大便出血的問題嚴重左,

飯菜已經多菜少肉左, 仲買左唔少滑肠的生果俾佢食,

但情況都係無改善. 

呢晚食完飯仔我湊佢去Poo Poo,

點知出血問題都仲係有, 而且仲勁過之前.

最後, 我地拿拿林揸車出港安睇 (好在, 之前睇開的醫生有係度駐診).


醫生的結論 : 呢個係" 慣性便秘" 問題, 開左藥水同藥膏, 

之後飲食要"更加"多菜少肉, 戎食麵包, 蛋糕, 就算要食都只可以要食麥包,

仲有加紅米黎煮飯 / 粥 (增加纖維), 奶粉要再開稀d~

***遲下會再post 有關呢個問題的Blog 文***


30/7/2013 (Tue)

呢一日, 應該係我出黎做野咁耐最嘔心的一日.

早幾個月前, 我同同事都發現公司的"小強"多左, 

雖然佢既size比平時我地見開果d細好多,

不過日日都有1-2隻都唔係路咖

最後我同同事買左"甲甴屋"番黎擺, 

起初都有d用, 真係少左下~但之後情況又打回原形....


呢日lunch time, 我如常係我張工作檯度見到1-2隻小強,

本黎打死就算了...點知突然俾我係拎番公司用的多士爐度又見到一隻,

個下我都未知驚, 大膽到仲用個多士爐整多士食 (依家諗番...我真夠嘔心啦)

食完野, 眼見工作檯咁多野..咪諗住抹下清潔下乾淨d, 可以減少小強出沒.

抹左一半檯, 最嘔心的事就出現啦...

大家想像下呢張紙後面有4隻小強...Σ（ﾟдﾟlll）

我當下嚇到成個彈起....完全唔敢行埋張檯去..

好在有個大無畏的女同事幫我打死左....

但呢樣都未夠嘔心...

之後我同事仲發現我塊board條空隙位度藏左好多小強屎, 黑色一點點

其實平時我都有見到 ><", 不過我唔知原來果d係佢地的便便...

仲有仲有撩左4粒小強蛋!!! 我果刻簡直想死, 原來我一直與敵同眠!!!!!

清理屍骸後, 我即刻衝落樓買左殺蟲水, 漂白水 (用黎加水抹檯),

大肆清潔完, 自我感覺好d...但其實惡夢仲未完><"


31/7/2013 (Wed)

經歷琴日一役, 我已經唔敢再親自打死小強.

好明顯當你越怕一樣野, 佢就越會出現.....

話口未完又走左兩隻出黎....

之後都係叫同事幫手打死佢...


Lunch time, 我去左藥房買煙霧蛋 (老公話呢個最有效),

番到公司攰攰地就訓左一陣,

訓醒左又再用殺蟲水噴塊board,

一噴又走左3隻出黎...有一隻仲要比平時的大好多, 仲要識飛..(上網睇識飛的係"大左肚"仲要係"母後"黎咖)

同事幫手打完後, 就話我個位應該係源頭, 最嚴重!!

我果下的心情大家都應該想像得到吧~


幾辛苦終於捱到收工, 係公司等老公過黎幫手拎我清理左的雜物 (之前擺得太多係公司) 番屋企,

仲有就放煙霧蛋!!!!!!!!!!!


1/8/2013 (Thu)

琴晚成晚都諗緊今早番到公司會係點? 到底有幾多小強屍骸? 我個位會唔會好壯觀!!!???

搞到成晚都訓得唔好~

幸好老公一早陪我番公司一齊清理屍骸, 今早總算無咁驚~

唔好以為佢好抵讚, 實情係佢成晚都嚇我話我個位一定好恐怖, 10幾隻屍骸一定無走雞,

俾佢話一話, 我驚到成晚哦佢, 最後佢先決定陪我番公司執屍!


最後, 煙霧蛋作戰好成功.

清理左30隻有多的小強屍骸 

而我最擔心的位置都只係有4-5隻....比預期中算少~

經此一役後, 依家我的工作檯要有幾乾淨得幾乾淨,

食完野都一定會即時清理左先, 消毒紙巾常備看門口,

再加滅"強"三寶坐陣, 之後一定會"Live to Good"!!!(￣^￣)ゞ

Blessing~

成長~手指指@豐澤電器

上星期日, 我地成家去左電器舗睇&買抽濕機~

事關屋企最大果部 (我地有兩部), 佢的年紀仲大過我老公

聽落都嚇人呢~(不得不讚以前的電器真係"巧耐用"), 

但佢的濕機力暫時都仲係無"機"可及 !!

不過安全起見, 我地都係決定買番部新既~

一入到去, 最開心就係Yin B~

因為裡面有"N"咁多制俾佢禁

首先埋手既係Printer機~

見佢禁得咁"落力", 我突然大大聲話"爺爺黎啦" (想知點解我咁講~睇前文按此)

佢即時停手睇下爺爺係咪係度~

之後知我呃佢, 就繼續玩佢的"玩具"


平時係屋企佢最鐘意但我地一定唔俾佢玩的電風扇, 佢又點會放過~

起初我話"No~"佢都扮下野唔去禁既(但好明顯佢眼神話俾我知佢唔係!!!)


之後爺爺都仲陪佢一齊玩, 連爺爺都俾玩, 佢更加睬我都傻~

算啦~反正都係"唔過電"的display, 我都由佢玩~

禁完制, 就開始係咁手指指~

Yin B : 點解呢度門開唔到既~

Yin Ma : 仔~度門係上面呀~

Yin B : 呢個咩黎咖?! 隻眼咁大既!!! @@

Yin Ma : 佢係"大眼雞"洗衣機

Yin B : "大眼雞"都幾得意喔~好, 我就要呢部, 果部, 仲有果一部....

Yin Ma : .......我決定留你係度算了!


最後奉上當日的"小小電影" ❤